HOME TLAXCALA
The Translators’ Network for Linguistic Diversity
TLAXCALA'S MANIFESTO  WHO WE ARE  TLAXCALA'S FRIENDS   SEARCH 

SOUTH OF THE BORDER  (Latin America and the Caribbean)
IMPERIUM  (Global Issues)
THE LAND OF CANAAN  (Palestine, Israel)
UMMA  (Arab World, Islam)
IN THE BELLY OF THE WHALE  (Activism in the Imperialist Metropolis)
PEACE AND WAR  (USA, EU, NATO)
THE MOTHER CONTINENT  (Africa, Indian Ocean)

TYPHOON ZONE  (Asia, Pacific Basin)
WITH A K AS IN KALVELLIDO (Diary of a Proletarian Cartoonist)
STORMING BRAINS  (Culture, Communication)
UNCLASSIFIABLE  
TLAXCALAN CHRONICLES  
TLAXCALA'S REFERENCE ZONE   (Glossaries, Dictionaries, Maps)
LIBRARY OF AUTHORS 
GALLERY 
TLAXCALA'S ARCHIVES  

24/10/2017
Español Français English Deutsch Português Italiano Català
عربي Svenska فارسی Ελληνικά русски TAMAZIGHT OTHER LANGUAGES
 

Ddurò n IRI deg tuttya taserdasit* ay d-yellan deg Honduras


AUTHOR:  Tameskart Eva GOLINGER

Translated by  Tasuqilt: Omar Mouffok


*coup d’Etat militaire


International Republican Institute (IRI, [d aḥric seg NED])  acḥal n wayyuren ay-a seg wasmi ara yessawal γef ”tuttya” deg Honduras.

International Republican Institute ttwalin-t kra d afurk seg Ukabar Agdudan (Parti Républicain) n Yiwunak Yeddukklen, yerna d yiwen seg ṛebεa-nni n ”trebbaε tilemmasin” n National Endowment for Democracy (NED). Aneggaru-a d yiwet n tsebdadt (fondation) tamarikanit, idrimen-nnes ttekken-as-d seg Congress. Γef wakk-n nettwali, IRI yella yeẓra ad d-tili tuttya deg Honduras, ay deg ara yettwakkes uselway Zelaya. IRI yettwassen s dduṛ-nnes deg tuttya taserdasit ay d-yellan deg 2002 mgal n uselway n Venezuela, Hugo Chavez. Seg tama niḍen, d IRI, daγen, ay yekfan idrimen ed nnaṣ̣ayeḥ i trebbaε timeqranin ay yettekkan deg ussuffeγ n uselway Jean Bertrand Artistide seg udabu deg Haiti, deg 2004. Ama deg Venezuela neγ deg Haiti, IRI yekfa idrimen neγ/yerna yessγer ikabaren ed trebbaε-nni tisertiyin ay yettekkan deg tuttyiwin-a tinekraḍin (violentes) n yiselwayen ay yettwafernen s webrid n tugdut (démocratie).

Sdeffir ma tella-d tuttya taserdasit n 2002, deg Venezuela, aselway n IRI deg tallit-nni, George Folsom yessuffeγ-d yiwen n welγu n tγemsa (communiqué de presse) ay deg d-yenna ”IRI yella-d d tiqenṭert gar yikabaren isertiyen n tmurt [n Venezuela], yerna akk tirebbaε n tmetti taγarimt (société civile) la qeddcen akk-n ad d-meslen azekka n tugdut deg tmurt-nsen...”. Kra n tsaεtin sakk-in, tuttya-nni taserdasit ur tecci, yerna aγref (cceεb) n Venezuela yessukkes-d aselway-nnes (ay yettwakren yerna yettwaḥbes deg yiwen n usadur aserdasi [base militaire]), yerna yerra-d adabu n tmenḍawt (constitution) γer tmurt. Ma d IRI, yendem γef lfeṛḥ-nni ay yefṛeḥ qbel lawan. National Endowment for Democracy (NED), yiwet seg trebbaε timeqranin ay yettakfen idrimen i IRI, yerfa imi IRI yekcef-d i wegdud tukci ay kfan Yiwunak Yeddukklen idrimen i wakk-n ad εawnen imḍebbren n tuttya taserdasit deg Venezuela. Aselway n NED, Carl Gershman, seg wakk-n yerfa γef tuccḍa ay iga IRI, arma ay yuzen tabṛat i Folsom ay deg yezzem fell-as: ”Aṛeḥḥeb [s tuttya-nni taserdasit] war aḥezzeb d ay-n ay yekkan ad tegreḍ IRI deg tsertit irewyen n Venezuela”. Gershman, lemmer d ay yufi, ad yejj dduṛ n NED akked IRI, deg uheyyi ed uεiwen n tuttya taserdasit mgal Chavez, d tamsalt yeffren. 

John McCain (aselway n IRI, seg Ukabar agdudan [républicain] ay yettekkan deg tefranin n tselwit deg Yiwunak Yeddukklen, mgal n Barack Obama)

Aselway n IRI, ass-a, d asinatur John McCain. Asudu-a (institut) yennulfa-d deg 1983, seddaw n udabu n Ronald Reagan, yerna d aḥric seg National Endowment for Democracy ay yekkaten i lmend n ”wesnerni n tugdut deg umaḍal”.  Deg tidet, yiwen seg wid yettekkan deg ussebded n NED, Allen Weinstein, deg yiwet n tdiwennit ay iga deg Washington Post, deg 1991, yenna-d γef lecγal n tsebdadt-a (fondation): ”Amur ameqran seg way-n la ntteg ass-a [deg NED] d CIA ay yellan tetteg-it s tuffra 25 n yiseggasen ay-a”. IRI s timmad-nnes, deg udeg-nnes (www.iri.org), yenna-d sbedden-t-id i wakk-n ad yeqdec deg Temrikt Talatinit, asmi ay yebda Congress iḥeṛṛes Reagan yerna yettεassa-t i wakk-n ad yeḥbes aεiwen n trebbaε timsellḥin, tisnarafin (dictatures) ed trebbaε n tmattant deg Temrikt Talemmast ed Temrikt n Wenẓul, d tid ay llan naqal Yiwunak Yeddukklen ttεawanen-tent i wakk-n ad d-sbeddent inabaḍen (lḥukumat) ara yilin d imeddukal n Marikan yerna ad meḥqen imussa (mouvements) izelmaḍen. Ihi, deg 1983, ”Congress yeqbel ṛṛay n Reagan, yerna yessebded-d National Endowment for Democracy i wakk-n ad iεawen wid yebγan ad snernin tugdut deg wakk timiwa n umaḍal. Tasebdadt-a (fondation) tesεa ṛebεa n yisuda (instituts) ay yettgen leqdic iwizi yerna ur ddin akked kra n ukabar, yerna d nitni ay iqeddcen deg wenrar i lmend n ussuffeγ n yeswan (buts) n NED γer tidet: amezwaru d IRI, wis sin d National Democratic Institute for International Affairs (NDI), wis tlata d Center for International Private Enterprise (CIPE), ma d wis ṛebεa d American Center for International Labor Solidarity (ACILS). ”Deg yiseggasen-nnes imezwura, IRI yeqdec ladγa i wakk-n ad yezreε tugdut deg Temrikt Talatinit. Seg wasmi ay ifuk Wemgaru (ṭṭrad) Asemmaḍ, IRI yessemγer anrar n leqdic-nnes i wakk-n ad yeqqel d tasebdadt ay yettεawanen tugdut ed tlelli deg wakk timiwa n umaḍal. IRI yelha-d s wahilen (programmes) deg wugar n 100 n tmura”.

Deg wussan-nnes imezwura, IRI, akked trebbaε-nni niḍen n NED ay yettekkayen deg tuttyiwin tiserdasiyin, kfan idrimen i tuddsiwin (organisations) deg Nicaragua i wakk-n ad d-snekren ad cewwlen anabaḍ (lḥukuma) n Yisandiniyen. Jeremy Bigwood, d aneγmas, yessefhem-d aḥric seg dduṛ-a deg umagrad-nnes ”No Strings Attached?, ”Mi ara terr NED deg yidis awal-nni-nnes aẓidan γef tugdut, tetteqqal d allal iẓewren deg way-n yerzan assekcem n yiqeddacen-nnes deg tmetti taγarimt (société civile) n tmura niḍen, i wakk-n ad tessiweḍ γer yeswan n Yiwunak Yeddukklen, γef wakk-n ay d-yenna William Robinson deg wedlis-nnes (d aselmad deg tesdawit n California, Santa Barbara). Wa d tiḥilet taciṭanit. Robinson yella deg Nicaragua deg tgara n yiseggasen n 1980 yerna iwala amek ara tqeddec NED akked tenmegla (opposition) tanicaragwit ay tettεawan Marikan, i wakk-n ad sseγlin Isandiniyen izelmaḍen deg tefranin n 1990”.

Ass-a, llan wanzaten (preuves) ed teftarin (documents) ay d-yesskanayen attekki n IRI deg tuttya taserdasit n 2002 deg Venezuela. Lqanun amarikani n Tlelli n Usselγu (Freedom of Information) d netta ay iledyen tawwurt i wakk-n ad nezmer ad d-nessekfel anzaten n uttekki-a, yerna s way-a, nezmer ad nẓer amek ay yekfa IRI idrimen, yenṣ̣eḥ yerna yessγer ikabaren n tenmegla (opposition) deg Venezuela i wakk-n ad gen tuttya-nni. Tzemrem ad tafem ugar n yisalan, daγen, deg wedlis-inu (The Chávez Code: Cracking U.S. Intervention in Venezuela (Olive Branch Press 2006). Nnig way-a, IRI ed NED werjin nekṛen ula d yiwen n wanza seg wid-nni ay d-ikecfen dduṛ n IRI deg tuttya taserdasit n Venezuela deg Yebrir 2002, imi anzaten-a akk kkan-d seg teftarin n IRI ed NED s timmad-nsen, yerna tiftarin-a nesεa azref ad ten-nγer s yisem n lqanun n Freedom of Information.

S way-a, asmi ay d-tella tuttya taserdasit deg Honduras i lmend n usseγli n uselway Manuel Zelaya, ay yettwafernen s webrid n tugdut, ur yelli ccek γef uttekki n Yiwunak Yeddukklen deg temsalt-a. Melmi kan, NED yekfa 700.000 n yidulaṛen i IRI i wakk-n ad yesnerni ”tenbaḍt tamelhut (bonne gouvernance)” deg tmura n Temrikt Talatinit, am Honduras. NED terna-as daγen i IRI 550.000 n yidulaṛen i wakk-n ad yeqdec akked ”trebbaε n uxemmem” (”think tanks”) ed ”trebbaε n weḥṛas” deg Honduras i wakk-n ad d-yerbeḥ s idis n Marikan ikabaren isertiyen n tmurt-a, yerna NED yenna-d ”IRI ad iεawen ikabaren-a deg ussefεel n leṛyuy-nsen deg lḥemlat n 2009. IRI ad yekf azal ameqran i Honduras ara yessefrayen ad teg tifranin n tselwit (présidence) ed tefranin tiwamniyin (parlementaires) deg Nwembeṛ 2009”. Ay-a yesskanay-d s ttbut amek ay ggaren Yiwunak Yeddukklen iman-nsen deg tsertit n daxel n Honduras.

U.S. Agency for International Development (USAID), seg tama-nnes, tettakf-d yak aseggas 49 n yimelyunen n yidulaṛen i Honduras, yerna amur ameqran seg yedrimen-a ttuwehhan i wahilen (programmes) n ”wesnerni n tugdut”. Amur ameqran seg wid yettaṭṭafen idrimen-a d tuddsiwin (organisations) tihondurasiyin ay yettekkan deg tuttya-nni taserdasit (coup d’Etat), am tin n Consejo Nacional Anticorrupcion, Abesku ameqran (archevêque) n Tegucigalpa, Aseqqamu Ahondurasi n Teṛmisin tusligin [Entreprises Privées] (COHEP), Aseqqamu n Yemγaren (doyens) n Tesdawit, Takunfidiṛalit n Yiqeddacen Ihondurasiyen (CTH), Anmager n Wemtawa Aγelnaw (Forum de Convergence Nationale), Taxxamt n Tnezzut [ttjaṛa] (FEDECAMARA), Tiddukla n Yimidyaten Usligen (médias privés) (AMC), Tarbaεt n Paz y Democracia akked terbaεt n yinelmaden Generacion X Cambio. Idrimen-a yettakf-iten IRI i trebbaεt d aεiwen, am wakk-n daγen ay ten-yettṣ̣errif i lmend n ussileγ n yemḍebbren-nsent, yerna yettεawan-itent daγen s tukci n ttawilat, anṣ̣aḥ ama deg wenrar n leqdic neγ deg win n teγwalt (communication) akked ussejhed n yikabaren isertiyen. Tirebbaε-a gant-d yiwet n temsisit (coalition) ay isemman i yiman-nnes ”Union Civica Democratica de Honduras” (Tadukli Taγarimt [civique] n Tugdut n Honduras), yerna tadukli-a teqbel s lejheṛ tuttya-nni taserdasit ay yesseγlin aselway Zelaya.

Tamarut (secrétaire) n tγemsa n IRI, Lisa Gates, mi tt-id-sseqsan γef dduṛ n IRI deg Honduras, tenna-d wi d ”isalan n tkellax”. D acu kan, llant aṭas n tγawsiwin ay d-yesskanayen yella wassaγ (lien) gar IRI (ay yeqqnen γer Ukabar Agdudan [Parti Républicain] amarikani) ed tuttya taserdasit mgal n uselway Zelaya, am wakk-n idrimen-nni ay as-yettunekfen i IRI aseggas-a (ugar n umelyun n yidulaṛen) ad ilin ttusqedcen i lmend n tuttya-a. Sennig n leqdic ay itteg IRI deg wenrar, deg Honduras, s wahilen-nnes n ”tenbaḍt tamelhut” (bonne gouvernance) ed ”tezrirt tasertit” (influence politique), Alex Sutton, aselway n wahil awaẓi (programme régional) n IRI deg Temrikt Talatinit ed Kaṛayib, yemlal ed waṭas n tuddsiwin deg tmura n tama-a ay yeddan d tuttya taserdasit ay d-yellan deg Honduras. Sutton yessawel-d deg yiwen n usarag n 3 wussan ay tga CEDICE (Centro para la Divulgacion de Conocimiento Economico), d yiwet n terbaεt takenmagaẓt (ultraconservatrice) ay yeddren s yedrimen n Yiwunak Yeddukklen. Anemhal n CEDICE, Rocio Guijarra, yella d yiwen seg yemḍebbren imeqranen deg tuttya-nni taserdasit n 2002 mgal n uselway Hugo Chavez, yerna d Guijarra ay yestenyan tanaḍt-nni (décret) ay d-yesbedden tasnaraft (dictature) deg tmurt, yerna d ay-nni ay yejjan aγref ed yiγallen n yiserdasen ay yebγan ad d-rren lḥeṛma i tmurt-nsen. Asarag ay deg yettekka Sutton (yella-d gar 28 ed 29 Mayyu deg Venezuela), ḥedṛen deg-s yemḍebbren n umussu (mouvement) akenmagaẓ n Temrikt Talatinit, gar-asen Jorge Quiroga, aselway aqbur n Bolivia, ay d-yegren tiγri acḥal d tikkelt i lmend n usseγli n uselway n Bolivia, Evo Morales, am wakk-n ay yeḥdeṛ Mario Vargas Llosa ed memmi-s Alvaro, seg Peru, yerna deg sin yid-sen nnan-d qeblen tukksa n Zelaya seg udabu deg Honduras, yerna llan daγen deg-in aṭas seg yemḍebbren n tenmegla (opposition) tavenezuelit, amur ameqran deg-sen ttwassnen s uttekki-nsen deg tuttya taserdasit n 2002 ed leqdicat n ussenker n ccwal ay d-iḍefren tadyant-nni deg Venezuela. Amur ameqran seg wid ay yellan deg usarag n CEDICE, deg Mayyu 2009, sseknen-d s lejheṛ tadhelt-nsen (soutien) i tuttya ay yesseγlin aselway Zelaya.

Maca anza (preuve) ameqran ay d-yesskanayen attekki n IRI deg tuttya n Honduras netta d yiwet n teẓrawant (vidéo) ay d-yersen deg udeg n Usudu-a (Institut) deg wassaγ-a : http://www.iri.org/multimedia.asp. Taẓrawit-a tesskanay-d yiwet n teskant ay d-tga Susan Zelaya-Fenner, ay iqeddcen d tamalalt (assistante) deg wahilen n IRI, deg 20 Meγres 2009, yerna tessawal-d deg-s γef wahil n ”tenbaḍt tamelhut” (bonne gouvernance) deg Honduras. Zelaya-Fenner tenna-d, deg tezwara n teskant-nnes tettwali ”llant snat n tγawsiwin ay d-ijebbden lwelha deg Honduras”. Tamezwarut, ”Honduras ur as-yettunekf wazal ameqran deg tama-a tamecṭuḥt. Kra n medden nnan-d tuttyiwin tiserdasiyin ay d-yellan deg Honduras ggtent ugar n yiseggasen ay tedder tmurt-a deg uzarug (indépendance). D acu kan, tagara-a, tamurt-a ttwalin-tt kra d tigejdit n werkad deg tama-a, yerna llan ula d wid ay as-isemman U.S.S. Honduras, imi ay tessaweḍ ad tessinef i wakk tilufa ay iḥuzan ljiran-nnes deg yemgura iγarimen (guerres civiles) ay inekren deg-sen deg yiseggasen n 1980”.

Yessekf ad d-nger tamawt, ay-n d-teqsed Zelaya-Fenner s ”U.S.S. Honduras” akked ”tessaweḍ ad tessinef i wakk tilufa ay iḥuzan ljiran-nnes deg yemgura iγarimen (guerres civils) ay inekren deg-sen deg yiseggasen n 1980” netta deg tidet, d asseqdec-nni ay sqedcen Yiwunak Yeddukklen, CIA ed Pentagon tamurt-a i wakk-n aznen seg-s wid ara icewwlen timura ay tt-id-isuman. Deg tallit-nni, anmahal (ambassadeur) John Negroponte ed weknaner (colonel) Oliver North sleγman, kfan idrimen yerna swejden-d lecγal imsellḥen ay llan ttgent-ten trebbaε n tmattant i lmend n tmenγiwt, aεetteb, aḥqar, tukerḍa ed yemdanen, yerna d igiman (luluf) n yifellaḥen ed yemdanen ay deg ”cikken” qeddcen deg yemzelmaḍen (gauchistes) ay γef ssukken akk anect-a deg Nicaragua, Salvador, Guatemala ed Honduras.

Zelaya-Fenner terna-d : ”S way-a, Honduras teqqel, tagara-a, d tamurt irekden, d acu kan, mazal-itt d tigellilt, anamek-nnes (lmeεna-nnes), attan seddaw n uṛadaṛ, yerna timura niḍen ur d-rrint lwelha-nsent γer-s. Aselway-nnes ass-a, Manuel Zelaya, akked yimeddukkal-nnes, imzelmaḍen (gauchistes) n Temrikt Talatinit, snekren-d aṭas n ccwal, tagara-a, deg tmurt-a. Zelaya d win yebγan ad iεaned Hugo Chavez deg tegrawla-nnes timettit (révolution sociale). Zelaya yekka amur ameqran seg tallit n tselwit-nnes (présidence) iεerreḍ ad yesseqneε Ihondurasiyen i wakk-n ad ḍefren abrid n Venezuela, deg lweqt ay deg nitni bγan ay-n inefεen taswiεt-a yerna la ttmalen ugar γer ”tlemmast”. Zelaya, ay imalen γer uzelmaḍ, la irennu kan yessemγar ccwal yellan yagi deg tmurt-a. Aggufsu (corruption) simal irennu, tinnγi (criminalité) werjin tennerna akk-n tella ass-a. Assetti n tehyufin (trafic de drogue) ed tekriḍt-nnes (violence) bdan la ttawḍen ula γer Miksik, yerna la nettḥulfu s tidet ccwal ay yellan deg tmurt-a, seg sdaxel ay as-d-yekka, yerna ay-a d amaynut deg umezruy n tgara-a deg Honduras. Naqal nella nettxemmim tuttyiwin tiserdasiyin (coups d’Etat) tlatinn n yiseggasen ay-a seg wasmi ay fukent, maca ahat, zemrent ad d-qqlent ass-a (dγa ḍsan-d wid-nni yellan deg-in)”.

D tidet tenna-d ay-a ? Ih, d tidet, yerna tzemrem ad t-teslem s timmad-nwen deg teẓrawit-nni (vidéo). Ihi nezmer ad nxemmem tuttya-a taserdasit ay yettin aselway Zelaya s zzheṛ kan ay d-tella tlata n wayyuren sdeffir ma tga-d Zelaya-Ferrer taskant-nnes ? Imḍebbren n weγlif n tγawsiwin n beṛṛa n Yiwunak Yeddukklen steεṛfen llan εelmen s ussewjed n tuttya-a acḥal n wayyuren ay-a. Adumaru n Uwanak (sous-secrétaire d’Etat), Thomas Shannon, yerza γef Honduras qbel ad d-tili tuttya-nni, yerna ad yili, ahat, yemsewwaq ed kra seg wid-nni ara d-yettheyyin tuttya i wakk-n ad εerḍen ad d-afen ”tifrat” niḍen i ”wugur”. D acu kan, Iwunak Yeddukklen kemmel ttakfen idrimen s webrid n NED ed USAID i trebbaε-nni ed yiserdasen ay yettekkan deg tuttya-nni. Washington ur teqbil tadukli n Zelaya akked kra n yemḍebbren n tama-a, ladγa tadukli-nnes ed Venezuela akked Nicaragua, yerna ay-a ur yelli d ay-n yeffren. Nnig way-a, ẓran medden aselway Zelaya yella itteddu i wakk-n ad yessuffeγ iserdasen imarikaniyen seg usadur agnawi (base aérienne) n Soto Cano, imi ay yesseqdec idrimen ay as-d-tekfa ALBA (Tamsisit [Alliance] Tabolivarit n Temrikin, ay deg ttekkant Bolivia, Cuba, Ecuador, Dominica, Honduras, Nicaragua, Saint Kitts ed Nevis, Antigua ed Barbuda akked Venezuela), i wakk-n ad yerr asadur-nni d anafag aγarim (aéroport civil). Yuγ lḥal, asadur Soto Cano yesεa azal ameqran γer Pentagon.

Zelaya-Fenner, ay iqeddcen deg IRI, tessefhem-d azal ay tesεa Honduras deg teskant-nnes: ”Ayγer ay tesεa Honduras azal d ameqran ? Aṭas n medden ay d-yesseqsayen tuttra-a, gar-asen llan ula d imezrayen (historiens) ed yimazzayen (experts) ihondurasiyen.  Kra ttinin-d tamurt-a ur tesεi azal ameqran, yerna, s umata, yezmer ad yili yewεeṛ i wakk-n ad ten-nesseqneε. D acu kan, tamurt-a tezmer ad turar dduṛ d ameqran deg werkad n tama-a, yerna aseggas-a ad d-ilint tefranin deg Honduras. Ihi, ta d tagnit iwutan i wakk-n ad nεawen imegda (démocrates) [n tmurt-a] deg lweqt ay deg llan wid ara yekkaten i wakk-n ad hudden tugdut deg tama-a”.  

Ur yelli ccek, tuttya taserdasit ay yesseγlin aselway Zelaya d tin ay yes bγan Yimarikaniyen ad cewwlen inabaḍen (lḥukumat) n tmura n tama-a ara iqeddce n i wakk-n ad d-sbedden inagrawen (systèmes) niḍen deg wemkan n temsihrit (capitalisme). Yuγ lḥal, inagrawen-a n tugdut (démocratie) ay deg ara yettekki weγref (cceεb) ur ddin ed tmuγliwin n Yiwunak Yeddukklen. Timura am Venezuela, Bolivia ed Ecuador uwyent-d yiwen n webrid irebḥen deg bennu n tugdut ay deg ara yettekki weγref, d abrid ara iḍemnen tagadda tudmist (égalité économique) ed teγdemt timettit (justice sociale), yerna ad yessezwer nnfeε n weγref γef win n leswaq.  D ti ay d tarbaεt n tmura ay deg tettekka Honduras, yerna ula d nitenti iwet-itent uεekkaz n NED, USAID, IRI ed tnegga (agences) niḍen ara yeggaren iman-nsent deg tγawsiwin-nsent n daxel i wakk-n ad rwint tugdut-nsen ara yettnernin.


Taγbalut: The Role of the International Republican Institute (IRI) in the Honduran Coup

Amagrad aneṣ̣li yeffeγ-d deg 30 Yulyu 2009

Γef umeskar

Omar Mouffok d amaslaḍ (membre) n Tlaxcala, aẓeḍḍa n yemsuqqlen i lmend n uṭṭuqqet n yilsawen. Tzemrem ad d-tessersem tasuqilt-a anda ay awen-yehwa, d acu kan, yessekf ad d-ters tekmel yerna ad d-tbedrem ameskar-nnes (auteur), imsuqqel-nnes ed teγbalut-nnes.

URL n umagrad-a deg Tlaxcala:
http://www.tlaxcala.es/pp.asp?reference=9511&lg=ot

 


SOUTH OF THE BORDER : 14/12/2009

 
 PRINT THIS PAGE PRINT THIS PAGE 

 SEND THIS PAGE SEND THIS PAGE

 
BACK TO LAST PAGEBACK TO LAST PAGE 

 tlaxcala@tlaxcala.es

PARIS TIME  0:22