HOME TLAXCALA
The Translators’ Network for Linguistic Diversity
TLAXCALA'S MANIFESTO  WHO WE ARE  TLAXCALA'S FRIENDS   SEARCH 

SOUTH OF THE BORDER  (Latin America and the Caribbean)
IMPERIUM  (Global Issues)
THE LAND OF CANAAN  (Palestine, Israel)
UMMA  (Arab World, Islam)
IN THE BELLY OF THE WHALE  (Activism in the Imperialist Metropolis)
PEACE AND WAR  (USA, EU, NATO)
THE MOTHER CONTINENT  (Africa, Indian Ocean)

TYPHOON ZONE  (Asia, Pacific Basin)
WITH A K AS IN KALVELLIDO (Diary of a Proletarian Cartoonist)
STORMING BRAINS  (Culture, Communication)
UNCLASSIFIABLE  
TLAXCALAN CHRONICLES  
TLAXCALA'S REFERENCE ZONE   (Glossaries, Dictionaries, Maps)
LIBRARY OF AUTHORS 
GALLERY 
TLAXCALA'S ARCHIVES  

22/10/2017
Español Français English Deutsch Português Italiano Català
عربي Svenska فارسی Ελληνικά русски TAMAZIGHT OTHER LANGUAGES
 

Ldzayer teqqel d agudu n sselεa n Waεṛaben


AUTHOR:  Sγur Nora BOUDEDJA

Translated by  Tasuqilt : Omar Mouffok


Anekcum ay tekcem Ldzayer γer Wasun Aεṛab Ameqran n Wembaddel Ilelli (Grande zone arabe de libre-échange) d ayen ay nessarem ad yejj imsifḍen idzayriyen ad afen leswaq imaynuten anda ara ssenzen sselεa-nsen. D acu kan, ineggura-a ttuxeyyben, γas werεad yuwiḍ useggas seg wasmi ay yebda leqdic deg wenrar s leεqed-a imi d sselεa kan n tmura taεṛabin ara d-ikeccmen ver Ldzayer, deg lweqt sselεa tadzayrit ur tkeccem γer-sent. « Timura taεṛabin reglent iberdan i sselεa tadzayrit s twesyin (impôts), γas akken kecment deg wasun n wembaddel ilelli yerna sselεa tezmer ad tekcem s tlelli seg tmurt γer tayeḍ », ay d-yenna yiwen n yemḍebber deg tmarit (secrétariat) n Tseqqamut tateknit n weḍfar ed uqeyyem n wasunen n wembaddel ilelli, yerna ur yebγi ad d-yettwakcef yisem-nnes. Taseqqamut-a tessawel-d γef tugdi n yemsifḍen idzayriyen.

Sselεa tabeṛṛanit tettnuzu deg yal amkan deg Ldzayer, ma d tin n tmurt ur tufi abrid ad teffeγ γer beṛṛa

Yuγ lḥal, aṭas n yemsifḍen ay as-yeccetkan i Tseqqamut-a, yerna γef wakken nettwali, tagmat taεṛabt teqqim kan deg wawal akked umenni. Leεqed-a d win ara yejjen, lemmer d lebγi, imsifḍen idzayriyen ad ssifḍen (exporter) sselεa-nsen γer tmura taεṛabin war ma xellṣ̣en tiwsi (impôt) i tedwanin n tmura-a, neγ γas ma xellṣ̣en, ur aṭas. D acu kan, kra n tmura, γas stenyant leεqed-a, ḥettment, seg tama niḍen, γef yemsifḍen idzayriyen ad d-gen aṭas n lekwaγeḍ, yerna d aya ara yerrẓen ifadden ula i wid yesεan lebγi d ameqran deg wul-nsen.

Imsifeḍ (exportateur) yebγan ad yessenz sselεa-nnes deg Maṣ̣er ad d-yekk γef wakk uguren n tedbelt (administration). “Zik, nella nettazen tafatuṛt ed uselkin (certificat) n laṣ̣el  n sselεa srid [γer Maṣ̣er], maca ass-a yessekf ad ten-nazen, qbel, γer tmahelt (ambassade) n Maṣ̣er deg Ldzayer akken ad ttwaḍebεen. Aya yettḍeyyiε-aγ akud ed yedrimen, yerna yessenqas seg lfayda n sselεa-nni”, ay aγ-d-yeḥka yemḍebber-a.

Adzayri ay yebγan ad yessifeḍ (exporter) γer Libya ad d-yemlil, ula d netta, uguren iweεṛen. “Imeddukal-nneγ ilibiyen cerrḍen-d iqenṭaren n lekwaγeḍ. Akken kan ara cikken yella kra ur neṣ̣fi, ad d-rren kullec, ama d sselεa, ama d lekwaγeḍ. Ula d nitni ssutturen-d seg yemsifḍen (exportateurs) ad d-ḍebεen lekwaγeḍ-nsen deg tqenṣ̣ult (consulat) n Libya deg Ldzayer akked weγlif (ministère) adzayri n tγawsiwin n beṛṛa. Arma yeṛwa bab-nnes tazzla ara yessiweḍ sselεa-nnes γer tlisa n Libya”, ay aγ-d-yenna yemḍebber-a, war ma yettu ad d-yebder Itunsiyen. Γef leḥsab-nnes, ineggura-a, ula d nitni, ssnen ad d-snulfun uguren akken ad sεerqen abrid i unekcum n sselεa tadzayrit γer ssuq-nsen.

“Tettren-d, tikkal, kra n lekwaγeḍ iweεṛen”, γef wakken d-yenna.  Γef umedya (lemtel), yiwet n teṛmist (ccarika) n yiẓem (jus) yettwassnen deg Ldzayer yerna tella tessefray ad tessifeḍ (exporter) γer Tunes, tettuxeyyeb mi as-d-ttren Yitunsiyen aselkin n tedyuksint (certificat de dioxine). “Lkaγeḍ am wa ur yelli. Wi d uguren ay d-snulfan akken ad reglen anekcum n sselεa tadzayrit γer ssuq-a”, ay d-yenna yemḍebber-a. Tadyant am ta teḍra-as daγen i yiwen n wenfaras (producteur) n tṛakniwin ay yellan yebγa ad yessifeḍ (exporter) γer Meṛṛuk. Acrik-nnes ameṛṛuki yella yessekf ad d-yawey ttersiḥ i tektert (importation) akken ad d-yesfaydi seg εeffu n twesyin n tedwant (droits de douane). D acu kan, iduba (autorités) imeṛṛukiyen ur qbilen ad as-d-kfen lkaγeḍ-a ara iledyen ssuq ameṛṛuki i wenfaras-nni adzayri. Yuγ lḥal, kra n yenfarasen imeṛṛukiyen ugaden ad d-tili temsizzelt gar-asen ed Yidzayriyen, dγa ḥeṛsen anabaḍ (lḥukuma) ameṛṛuki akken ur yettajja tiṛakniwin tidzayriyin ad d-sfaydint seg εeffu n twesyin n tedwant. Taṛmist-nni tadzayrit tesṛuḥ ssuq γef ljal n lkaγeḍ-a. Yella daγen yemsifeḍ (exportateur) adzayri niḍen ay yebγan ad yessifeḍ tini (ttmeṛ) γer ssuq ameṛṛuki, yerna ula d netta reglen-as abrid.

Agudu ed usseγli n lbeqq

S yisem n tdukli tudmist (économique) timqeddest gar tmura taεṛabin, Ldzayer tsemmeḥ aṭas seg umur-nnes i tmura-a “tiysetmatin” yettekkan deg Wasum Aεṛab Ameqran n Wembaddel Ilelli (Grande zone arabe de libre-échange). Yuγ lḥal, γas timura-a ttgent-d uguren i Yidzayriyen akken ad ssifḍen (exporter) sselεa-nsen, iduba idzayriyen ur asen-gin uguren i yemsifḍen n tmura-a.

Nnig n wuguren ay d-ttgent kra n tmura i yemsifḍen (exportateurs) idzayriyen, timura-a daγen sseqdacent tiḥila yerna ur ttqadarent ilugan (règles) n temsizzelt. “Timura-a snuzuyent sselεa-nsent s ssuma irexsen akken ad d-sseγlint lbeqq”, ay d-yenna yemḍebber-a ay netter, ay iqeddcen deg yiwet n tseqqamut yeqqnen γer Texxamt n Tnezzut (chambre de commerce) tadzayrit. “Γef umedya (lemtel), kra n yiẓmawen n yigumma (jus de fruits) yers-d deg-sen ttwaxedmen deg Tunes, yili ttwaxedmen-d deg tmurt niḍen. Tabwaḍt-nni n Tetrapack ur d-tettwaxdem deg Tunes, yerna ula d sskeṛ-nni ur yelli nsen. Ula d iẓem-nni uwyen-t-id seg tmurt niḍen. D aman-nni kan ay as-rnan akked yiqeddacen-nni ay t-id-ixedmen ay d Itunsiyen, maca nitni srusuyen-t-id amzun d iẓem atunsi”, ay d-yenna.

Sakkin yerna-d: “Llan yilugan (règles) i ubeyyen n laṣ̣el n sselεa, yerna sselεa-nni yessekf ad tqader ilugan-a akken ad yetbet laṣ̣el-nnes”. Yuγ lḥal, ugur-a yerza ula d sskeṛ-nni ay d-yettwaketren (importé) seg Maṣ̣er imi ay yella ccek deg laṣ̣el-nnes. “D tidet, Maṣ̣er txeddem-d sskeṛ n ubiṭrab, maca ayen ay d-txeddem ur d-ikufa ula d Imaṣ̣riyen. Γef waya, Maṣ̣er trennu tessaγ-d sskeṛ seg tmura n beṛṛa. Dγa mi ara nwali tesnuzuy sskeṛ i Ldzayer, ur nezmir ad nefhem aya. Γef waya ay ncikk deg laṣ̣el n sskeṛ ay d-ssenzen i Ldzayer”, ay d-yenna yemḍebber-a.

Yuγ lḥal, tawliwla tamsenzit (balance commerciale) tesskanay-d uguren ay sεan Yidzayriyen akken ad skecmen sselεa-nsen γer leswaq aεṛaben. Deg setta n wayyuren imezwura n useggas-a [2009], Ldzayer tembaddal  ed tmura n Wasun Aεṛab Ameqran n Wembaddel Ilelli 742,7 n yimelyunen n yidulaṛen n sselεa (menγir lgaz ed upitṛul), d acu kan, 693 n yimelyunen n yidulaṛen seg wanect-a d azal n sselεa ay d-tekter (importer) Ldzayer seg tmura-a, deg lweqt ay deg Idzayriyen ssafḍen (exporter) kan 49,76% n yimelyunen n yidulaṛen γer tmura-a. S waya, taktert (importation) n Ldzayer seg tmura taεṛabin n wasun-a terna s 28%, deg lweqt ay deg assifeḍ yuder s 63%. Izwal-a (chiffres) sskanayen-d anect yemgerrad wembaddel gar Ldzayer ed tmura taεṛabin, yerna deg tegnit am ta, leεqed n unekcum n Ldzayer γer Wasun-a n wembaddel ilelli ur yelli d taγawsa ay deg yal idis yufa lfayda-nnes, wanag Ldzayer texṣ̣er deg wanect-a.

Uguren gar Yidzayriyen

Ugur ameqran netta d Idzayriyen s timmad-nsen ay d-yeskecmen uccen s axxam. Idzayriyen yebγan ad ssenzen sselεa-nsen deg tmura-a nnan-d llum ur yelli kan γef tmura-a ay yettnadin ad ḥuddent sselεa-nsent. Γef leḥsab-nsen, ṛṛay adzayri yella yezleg seg tazwara, yerna asmi ay yettustenya leεqed-nni, tiṛmisin (ccarikat) tidzayriyin qublent timsizzelt n tmura-a war ma sεant ayen ay yes qablent. Awanak (ddula) ur iεawen tiṛmisin-a akken ad gent isurifen-nsen imezwura deg unekcum-nsent deg wasunen (zones) n wembaddel ilelli. S waya, uguren llan d ilqayanen ugar. Yuγ lḥal, aya yeqqen γer wugur-nni ameqran ay deg Ldzayer ur tetteg leqdic yessekfen akken ad tesmel (promouvoir) sselεa tadzayrit menγir lgaz ed upitṛul. Bitt, deg wenrar-a, Ldzayer tessen kan ad d-twet deg yiman-nnes, war ma tga kra n ubeddel.

« Nesεa gar 500 ed 600 n yemsifḍen (exportateurs), yerna aṭas seg-sen ur llin d imsifḍen yezgan. Llan kann 200 n yemsifḍen yezgan. Aya d ulac. Deg Tunes, yiwet kan n temdint tezmer ad tesεu 200 n yemsifḍen, deg lweqt ay deg γer-neγ, tamurt s lekmal-nnes tesεa kan 200 n yemsifḍen », ay d-yenna yemḍebber-a n Texxamt n Tnezzut ed Temguri. Abrid n yemsifḍen idzayriyen mazal-it γezzif yerna yenneḍ, imi mazal-iten yessekf fell-asen ad ṛwun tazzla deg tedbelt (administration) akken ad frun lecγal-nsen. « Mi ara bγunt teṛmisin (ccarikat) ad ssifḍent seg tmurt tabeṛṛanit γer Ldzayer, sfaydayent-d seg εeffu seg twesyin n tedwant (droits de douane). Ma d infarasen-nneγ (producteurs) yessekf ad xellṣ̣er gar 5 ed 30% n twesyin n tedwant. Tikkal, tinegwa timezwura yessekf ad xellṣ̣en fell-asent gar 15% seg wazal-nsent i tedwant, deg lweqt ay deg afaris-nni (produit) s timmad-nnes yessekf ad xellṣ̣en fell-as tiwsi n 5%. Dγa llant kra n tγawsiwin d tuzligin deg twesyin n tedwant, yerna aya ur yezmir ad yejj infarasen idzayriyen ad d-awyen iman-nsen deg ssuq. Seg wakken tewεeṛ tegnit arma ay qqlen waṭas n yenfarasen (producteurs) idzayriyen ssinifen ad kecmen deg ssuq n ussifeḍ (exportation », ay d-yenna yemḍebber-a.

« Infarasen (producteurs) idzayriyen ttnadin ad ssenzen ugar deg ssuq adzayri, wala deg tmura n beṛṛa. Ayγer ara yerẓ wenfaras iγef-nnes akken ad d-yaf imsaγen (imectura) anda niḍen deg lweqt ay deg imsaγen sṭebṭuben-as-d γef tewwurt akken ad d-sγen sselεa-nnes ? D acu kan, lemmer Awanak (ddula) adzayri itteg ifadden s tidet, ama s webrid usrid neγ arusrid, i wakken ad ddun d-rebḥen ugar n yedrimen deg tmura n beṛṛa, infarisen-nneγ ad qeblen. Sselεa tadzayrit tesεa tizemmar akken ad tenz deg beṛṛa, maca infarasen ur wellhen tamuγli-nsen γer waya. D tiwinas (timeyyatin) n yelmeẓyen ara yesseftayen idrimen deg tnezzut tarmuddist (commerce informel) ; lemmer ad asen-yeg Uwanak ifadden [s ussifses n ccuruḍ n ussifeḍ], zemren ad wellhen tamuγli-nsen γer ussifeḍ. Werjin tga-d Ldzayer kra n tsuddest (stratégie) imeεnen n i lmend n wesnerni n ussifeḍ n sselεa yexḍan lgaz ed upitṛul », ay d-yenna.  

D acu kan, Awanak (ddula) yeldey aṭas n yiberdan i lmend n ussifses n ussifeḍ (exportation) deg yiseggasen-a ineggura. Γef umedya (lemtel), ass-a yella Usenduq uslig n tesmelt n ussifeḍ (Fonds special pour la promotion des exportations – FSPE) akked Tkebbanit n Usenkid (assurance) n Ussifeḍ, yerna iswi-nsen netta d assejhed n weḥric-a n tnezzut tabeṛṛanit. Nnig way-a, llan-d yisurifen n unabaḍ (lḥukuma) i lmend n ussifses. Maca aya yelfa-d ur d-yettkafi γef leḥsab n tecrawt (bilan) n Ldzayer deg wayen yerzan assifeḍ n sselεa yexḍan lgaz ed upitṛul. Tasuddest (stratégie) n wesnerni n ussifeḍ yessekf ad tt-id-yeg Useqqamu aγelnaw n tesmelt n ussifeḍ (Conseil national de promotion des exportations) ay d-yennulfan, deg lqanun, deg 2004. Maca ar ass-a, Aseqqamu-a n uciweṛ ara yeḥkem Uneγlaf Amezwaru, werεad ur t-id-sbedden deg lfeεl.

Iṛabulen n Wammas aγelnaw n usselγu ed taddadant (Centre national ḍinformation et des statistiques – CNIS) (yeqqnen γer tedwant (douane) tadzayrit, tteffγen-d yal aseggas yerna ttemcabin akk. Taγawsa tawḥidt ay yettbeddilen deg taddanant n yiṛabulen-a nettat d tin yerzan assifeḍ(exportation) n yiserγa (hydrocarbures). S waya, tawliwla tamsenzit (balance commerciale) tadzayrit txuṣ̣ṣ̣ s waṭas. Assifeḍ n sselεa yexḍan iserγa mazal-it ur yesεi azal ameqran. Yuγ lḥal, deg teswiεt-a, Ldzayer tessewjad iman-nnes ad ternu ad tekcem γer sin wasunen (zones) niḍen n wembaddel ilelli. Amezwaru d Tadukli n tdamsa ed uqariḍ (monnaie) ara icerken timura n Tefriqt tutrimt (taγerbit) ed Tiddukla Tuṛufit n Wembaddel Ilelli ay ikecmen yagi γer ssuq n Wasun Aεṛab Ameqran n Wembaddel Ilelli, akked leεqed n tiddukla ed Tdukli Tuṛufit (Union Européenne). Dγa, yessekf γef Ldzayer ad tesεu tasuddest (stratégie) imeεnen akken ula d nettat ad d-tḥettem sselεa-nnes, yerna aya ala lfayda ara as-d-yawey.  



Taγbalut: El Watan Grande zone arabe de libre-échange : L’Algérie devient le réceptacle des produits arabes

Amagrad aneṣ̣li yeffeγ-d deg 6 Dujembeṛ, 2009

Γef umeskar

Omar Mouffok d amaslaḍ (membre) n Tlaxcala, aẓeḍḍa n yemsuqqlen i lmend n uṭṭuqqet n yilsawen. Tzemrem ad d-tessersem tasuqilt-a anda ay awen-yehwa, d acu kan, yessekf ad d-ters tekmel yerna ad d-tbedrem ameskar-nnes (auteur), imsuqqel-nnes ed teγbalut-nnes.

URL n umagrad-a deg Tlaxcala:
http://www.tlaxcala.es/pp.asp?reference=9753&lg=ot


UMMA : 17/01/2010

 
 PRINT THIS PAGE PRINT THIS PAGE 

 SEND THIS PAGE SEND THIS PAGE

 
BACK TO LAST PAGEBACK TO LAST PAGE 

 tlaxcala@tlaxcala.es

PARIS TIME  17:47